کراچی یونیورسٹی کا فیصلہ: اشتعال انگیز لباس پہننے پر پابندی

کراچی: جامعہ کراچی کی انتظامیہ نے طلبہ کے لباس سے متعلق ضابطہ اخلاق جاری کیا ہے۔ نوٹیفکیشن کے مطابق، طلبہ کو صاف ستھرے اور مہذب کپڑے پہننے کی ہدایت کی گئی ہے۔ اس میں اشتعال انگیز، نفرت پھیلانے والے یا دھیان بھٹکانے والے کپڑے نہ پہننے کی تاکید کی گئی ہے۔ مزید برآں، جسم کو ظاہر کرنے والے، چھوٹی آستینوں والے، ٹائٹ کپڑے، قابل اعتراض پرنٹ یا گرافکس والے کپڑے اور عام چپلیں پہننے سے منع کیا گیا ہے۔

جامعہ کراچی کی مشیر امور طلبہ، ڈاکٹر نوشین رضا نے وضاحت دیتے ہوئے کہا کہ یہ نوٹیفکیشن نیا نہیں ہے۔ یونیورسٹی کی ڈسپلنری پالیسی کے تحت، طلبہ کو رہنمائی فراہم کرنے کے لیے ایسے نوٹیفکیشن جاری کیے جاتے ہیں۔ انہوں نے مزید کہا کہ جامعہ کراچی کے ضابطہ اخلاق میں ڈریس کوڈ کا ذکر ہے، جس کے مطابق طلبہ کا لباس باوقار ہونا چاہیے۔ طلبہ اپنی مرضی اور ثقافت کے مطابق کوئی بھی لباس پہن سکتے ہیں، بشرطیکہ وہ یونیورسٹی کے ضابطہ اخلاق کے مطابق ہو۔