بجلی کی قیمت میں کمی نہ ہونے پر عید کے بعد لانگ مارچ اور دھرنوں کا اعلان: حافظ نعیم الرحمان

کراچی: امیر جماعت اسلامی پاکستان حافظ نعیم الرحمان نے بجلی کی قیمتوں میں کمی نہ ہونے کی صورت میں عید کے بعد لانگ مارچ اور ملک گیر دھرنوں کا اعلان کر دیا۔

رمضان کے بعد بڑا لانگ مارچ ہوگا

کراچی میں پریس کانفرنس کرتے ہوئے حافظ نعیم الرحمان نے کہا کہ اب حکومت کو طے کرنا ہوگا کہ ریڈ لائن کیا ہے؟ کیونکہ جماعت اسلامی پر کوئی ریڈ لائن نہیں۔ انہوں نے واضح کیا کہ رمضان کے بعد بجلی کے نرخوں میں اضافے کے خلاف ایک بہت بڑا لانگ مارچ کیا جائے گا۔ ان کا کہنا تھا کہ “بجلی کے بلوں نے عوام کی کمر توڑ دی ہے، پوری تنخواہ بلوں میں چلی جاتی ہے، ہمارا مطالبہ ہے کہ بجلی کی فی یونٹ قیمت کم کی جائے”۔

حکومت پر سخت تنقید

حافظ نعیم الرحمان نے حکومت کو آڑے ہاتھوں لیتے ہوئے کہا کہ “پورے ملک میں بدانتظامی عروج پر ہے اور عوام شدید مشکلات کا شکار ہیں”۔ جماعت اسلامی کا مطالبہ ہے کہ فارم 45 پر جوڈیشل انکوائری کرائی جائے اور ان تمام جماعتوں کے خلاف کارروائی ہو جو آئین پامال کرنے میں ملوث ہیں۔

ملک گیر احتجاج کی حکمت عملی

امیر جماعت اسلامی نے اعلان کیا کہ یہ تحریک پورے پاکستان میں چلائی جائے گی۔ انہوں نے کہا کہ “کوئٹہ اور خیبر پختونخوا میں مسلسل کام جاری ہے، اور پہلے مرحلے میں اہم شاہراہوں پر دھرنے دیے جائیں گے”۔

عوام کو ریلیف دینے کا مطالبہ

حافظ نعیم الرحمان نے کہا کہ عوامی مشکلات کو کم کرنا حکومت کی ذمہ داری ہے، اور اس سلسلے میں فوری اقدامات کیے جانے چاہئیں۔ جماعت اسلامی نے ماضی میں مذاکرات کے ذریعے عوام کو ریلیف دلوایا ہے اور اب بھی حکومت پر دباؤ بڑھایا جائے گا تاکہ وہ عوام کے مسائل حل کرے۔

غربت اور مہنگائی پر تشویش

ان کا مزید کہنا تھا کہ “ملک میں دس کروڑ افراد غربت کی لکیر سے نیچے زندگی گزار رہے ہیں، حکومت کو اس پر سنجیدگی سے توجہ دینی ہوگی”۔ انہوں نے کہا کہ عوام کے مسائل پر اس وقت صرف جماعت اسلامی ہی مؤثر آواز اٹھا رہی ہے، اور دوسرے مرحلے میں جماعت اسلامی مزید قوت کے ساتھ اپنی جدوجہد کو آگے بڑھائے گی۔