محبت کی خاطر کراچی آنے والی امریکی خاتون، ایئرپورٹ حکام کی پریشانی کا سبب بن گئیں

کراچی: ایک امریکی خاتون، جو پاکستانی نوجوان کی محبت میں گرفتار ہو کر کراچی پہنچی تھیں، ایئرپورٹ حکام کے لیے مشکل صورتحال کا باعث بن گئیں۔

تفصیلات کے مطابق نیویارک سے تعلق رکھنے والی اونیجا اینڈریو رابنس نے سوشل میڈیا پر کراچی کے 19 سالہ ندال میمن سے دوستی کی، جو جلد ہی محبت میں بدل گئی۔ محبت میں اتنی شدت تھی کہ خاتون نے اپنے شوہر سے طلاق لے لی اور اپنے دو بچوں کو نیویارک میں چھوڑ کر پاکستان آ گئیں تاکہ اپنے محبوب کے ساتھ زندگی گزار سکیں۔

تاہم، جب وہ کراچی پہنچیں اور ندال میمن کے گھر گارڈن ویسٹ گئیں تو نوجوان نے انہیں قبول کرنے سے انکار کر دیا، یہ کہہ کر کہ اس کے والدین اس رشتے کے لیے راضی نہیں۔ یہ سن کر خاتون شدید صدمے میں آ گئیں اور بے سہارا ہو کر ایئرپورٹ واپس آ گئیں۔

ان کے ویزے کی مدت ختم ہو چکی تھی اور نیا ویزا لینے کے لیے ان کے پاس وسائل نہیں تھے۔ بے بسی کی حالت میں وہ سات دن تک ایئرپورٹ پر ہی رہیں، یہاں تک کہ ذہنی دباؤ میں آ کر اپنے کپڑے بھی پھاڑ دیے، جس کی وجہ سے ایئرپورٹ حکام کو پریشانی کا سامنا کرنا پڑا۔

خوش قسمتی سے، گورنر سندھ کامران ٹیسوری کی آمد پر انہیں یہ صورتحال دیکھنے کا موقع ملا، جس کے بعد انہوں نے فوری طور پر خاتون کے لیے ویزا جاری کروایا اور وطن واپسی کا انتظام بھی کیا۔ تاہم، خاتون نے واپسی سے انکار کر دیا اور امیگریشن کرانے سے بھی گریز کیا، جس کی وجہ سے ڈیپارچر لاؤنج میں ہنگامہ برپا ہو گیا۔

ایئرپورٹ حکام اور سیکیورٹی اہلکاروں نے کافی جدوجہد کے بعد خاتون کو ڈیپارچر لاؤنج تک پہنچایا، لیکن خاتون مختلف حیلے بہانوں سے طیارے میں سوار ہونے سے انکار کرتی رہیں، جس کی وجہ سے پرواز میں 36 منٹ کی تاخیر ہوئی۔ ایئرلائن حکام کے مطابق سیکیورٹی ایس او پیز کے تحت کسی بھی مسافر کو زبردستی پرواز میں سوار نہیں کرایا جا سکتا۔

یہ واقعہ سوشل میڈیا پر بھی وائرل ہو چکا ہے، جہاں صارفین اس پر ملے جلے تبصرے کر رہے ہیں۔ کچھ لوگ اسے سچی محبت قرار دے رہے ہیں، جبکہ کچھ کا کہنا ہے کہ یہ ایک غیر ذمہ دارانہ قدم تھا۔