ماں کی آخری رسومات کے لیے پیسے نہ ملے، بہنیں ایک ہفتے تک لاش کے ساتھ رہتی رہیں

بھارت کی ریاست تلنگانہ کے علاقے سکندرآباد میں دو نوجوان بہنیں مالی مشکلات کے باعث اپنی ماں کی آخری رسومات ادا کرنے سے قاصر رہیں اور رقم نہ ہونے کی وجہ سے تقریباً ایک ہفتہ تک والدہ کی لاش گھر میں رکھنے پر مجبور ہوگئیں۔

بھارتی میڈیا کے مطابق، واراسی گوڈا کی رہائشی ایک خاتون گزشتہ ہفتے بیماری کے باعث انتقال کر گئیں۔ ان کی 25 سالہ بیٹی راولیکا، جو ایک ساڑھی کی دکان پر کام کرتی ہے، اور 22 سالہ اشویتا، جو ایک ایونٹ پلانر ہے، مالی مشکلات کے سبب اپنی والدہ کی آخری رسومات کے اخراجات برداشت نہیں کر سکیں۔

رپورٹس کے مطابق، ان کے والد 2020 میں خاندانی تنازعات کے بعد گھر چھوڑ کر چلے گئے تھے اور تب سے انہوں نے کسی قسم کی مالی مدد فراہم نہیں کی۔ بے بسی کے عالم میں دونوں بہنیں ایک الگ کمرے میں رہتی رہیں جبکہ والدہ کی لاش دوسرے کمرے میں رکھی رہی۔

یہ افسوسناک واقعہ اس وقت سامنے آیا جب علاقے کے رہائشیوں نے بدبو محسوس کر کے پولیس کو اطلاع دی۔ پولیس نے فوری کارروائی کرتے ہوئے لاش کو پوسٹ مارٹم کے لیے ہسپتال منتقل کیا۔

رپورٹ کے مطابق، پولیس سے رابطہ کرنے سے قبل دونوں بہنوں نے اپنی والدہ کی آخری رسومات کے لیے ایک مقامی کثیرالمقاصد ہال سے مدد طلب کی تھی، تاہم ہال انتظامیہ نے پولیس کو مطلع کر دیا۔ پولیس ٹیم نے موقع پر پہنچ کر معاملے کی تحقیقات شروع کر دیں۔

مزید اطلاعات کے مطابق، یہ خاندان صرف دو ماہ قبل اس علاقے میں منتقل ہوا تھا۔ دونوں بہنوں نے اپنے ایک قریبی رشتہ دار سے مدد کی درخواست کی، مگر انہیں کوئی مثبت جواب نہیں ملا۔