حکومت کا بڑا اقدام: رمضان میں سستی چینی ہر ضلع میں فراہم کی جائے گی

وفاقی وزیر صنعت و پیداوار رانا تنویر حسین نے اعلان کیا ہے کہ رمضان المبارک کے دوران ملک بھر کے تمام اضلاع میں چینی رعایتی قیمتوں پر دستیاب ہوگی۔

وفاقی وزارت صنعت و پیداوار کے جاری کردہ بیان کے مطابق، رانا تنویر حسین کی زیرِ صدارت پاکستان شوگر ملز ایسوسی ایشن (PSMA) کا اجلاس منعقد ہوا، جس میں چینی کی مناسب قیمت پر فراہمی کے حوالے سے غور کیا گیا۔ اجلاس میں فیصلہ کیا گیا کہ ہر ضلع میں چینی کی تقسیم کے لیے ایک جامع مائیکرو پلان رواں ہفتے پیش کیا جائے گا۔

اجلاس میں شوگر ملز ایسوسی ایشن نے عوامی مفاد میں کم از کم قیمت پر چینی فروخت کرنے کا عزم کیا۔ وفاقی وزیر نے بتایا کہ رمضان سے تین دن قبل ملک بھر میں چینی کے اسٹالز قائم کیے جائیں گے، جو 27 رمضان تک جاری رہیں گے۔

انہوں نے مزید کہا کہ چینی کے ان اسٹالز پر وافر مقدار میں چینی دستیاب ہوگی، اور ان کا انتظام صوبائی حکومتوں کے تعاون سے کیا جائے گا۔ علاوہ ازیں، چینی کی رعایتی قیمت کا باضابطہ اعلان بھی رواں ہفتے متوقع ہے۔

رانا تنویر حسین نے کہا کہ رمضان عبادت اور برکتوں کا مہینہ ہے، اور اس دوران غریب طبقے کو زیادہ سے زیادہ سہولت فراہم کرنے کے لیے حکومت ہر ممکن اقدامات کر رہی ہے، تاکہ وہ کم قیمت میں ضروری اشیاء خرید سکیں۔