چیمپئنز ٹرافی جیتنا میرا خواب ہے، بھارت کو ہرانا نہیں: سلمان علی آغا

قومی ٹیم کے نائب کپتان سلمان علی آغا کا کہنا ہے کہ سب چاہتے ہیں کہ ہم بھارت کو شکست دیں، لیکن میرا اصل خواب چیمپئنز ٹرافی جیتنا ہے۔

پی سی بی پوڈ کاسٹ میں گفتگو کرتے ہوئے سلمان علی آغا نے کہا کہ کسی بھی بڑے ایونٹ میں ٹرافی اٹھانا ایک یادگار لمحہ ہوتا ہے، اور میری خواہش ہے کہ ہم چیمپئنز ٹرافی جیتیں۔

انہوں نے کہا کہ پاک بھارت میچ کا اپنا ہی ایک الگ ماحول ہوتا ہے، جسے دنیا کا سب سے بڑا مقابلہ کہا جاتا ہے، لیکن میرے نزدیک چیمپئنز ٹرافی جیتنا زیادہ اہمیت رکھتا ہے۔

پاکستان ٹیم میں ٹرافی جیتنے کی صلاحیت ہے

سلمان علی آغا نے کہا کہ “ہم چیمپئنز ٹرافی کے لیے پُرجوش ہیں اور ہماری ٹیم میں صلاحیت موجود ہے کہ ہم ٹرافی جیت سکیں۔”

انہوں نے اپنی کرکٹ کے سفر کے حوالے سے کہا، “میں کھیل سے بھرپور لطف اندوز ہو رہا ہوں، گزشتہ تین چار سال سے قومی ٹیم کے ساتھ ہوں اور جو نیا کردار مجھے دیا گیا ہے، اسے بھی انجوائے کر رہا ہوں۔”

نائب کپتانی ایک ذمے داری بھی اور آزادی بھی

سلمان علی آغا کا مزید کہنا تھا کہ نائب کپتانی ایک بڑی ذمے داری ہے، لیکن اس کے ساتھ کچھ آزادی بھی محسوس ہوتی ہے۔ انہوں نے مزید کہا کہ “آسٹریلیا اور جنوبی افریقہ کے خلاف فتوحات نے ہماری ٹیم کو بہت اعتماد دیا ہے۔”

اسپنرز کا کردار اہم ہے: ابرار احمد

دوسری جانب، اسپنر ابرار احمد کا کہنا تھا کہ اسپنرز کا کردار کسی بھی ٹیم کے لیے نہایت اہم ہوتا ہے۔ انہوں نے کہا، “میں ہمیشہ کپتان سے مشاورت کرتا رہتا ہوں، ون ڈے کرکٹ میں ڈسپلن کے ساتھ بولنگ کرنا ضروری ہوتا ہے، اور باہر بیٹھ کر بھی کافی کچھ سیکھنے کو ملا۔”