نواز شریف کا سیاسی مخالفین پر وار:وقت نے ثابت کیا مخالفین کو بغض، حسد، گالم گلوچ، بدتمیزی کے سوا کچھ نہیں آتا

پاکستان مسلم لیگ (ن) کے صدر اور سابق وزیر اعظم نواز شریف نے کہا ہے کہ وقت نے ثابت کیا کہ ان کے مخالفین کے پاس بغض، حسد، گالم گلوچ، بدتمیزی اور بدتہذیبی کے علاوہ کچھ نہیں۔

لاہور میں نواز شریف اور وزیراعلیٰ پنجاب مریم نواز شریف سے پنجاب اسمبلی کے مختلف ارکان نے ملاقات کی۔ ان ملاقاتوں میں بہاولپور، رحیم یار خان، مظفرگڑھ، لیہ، ڈی جی خان اور راجن پور ڈویژن سے تعلق رکھنے والے اراکین اسمبلی شامل تھے۔

ملک میں معاشی استحکام کا عندیہ

ملاقات کے دوران نواز شریف نے کہا کہ اللہ تعالیٰ کی مہربانی سے معاشی حالات بہتری کی جانب گامزن ہیں۔ پالیسی ریٹ میں کمی سے کاروباری برادری کا اعتماد بحال ہوا ہے اور سخت مالی حالات کے بعد مہنگائی میں بھی کمی آئی ہے، جس سے عوام کو مزید ریلیف ملنے کی امید ہے۔

انہوں نے کہا کہ “الحمدللہ ملک میں تعمیراتی سرگرمیاں دوبارہ شروع ہو چکی ہیں۔ شہباز شریف کی محنت اور جاں فشانی کو عالمی مالیاتی ادارے بھی سراہ رہے ہیں۔”

مخالفین پر تنقید

نواز شریف نے سیاسی حریفوں پر تنقید کرتے ہوئے کہا کہ “ہمارا ریکارڈ سیاسی، دفاعی اور ترقیاتی میدان میں ملک و قوم کی بے لوث خدمت سے بھرا ہوا ہے۔ اگر ترقی کا تسلسل نہ ٹوٹتا تو آج پاکستان خطے اور دنیا میں کہیں آگے ہوتا اور عوام کو مشکلات کا سامنا نہ کرنا پڑتا۔”

اراکین اسمبلی کا اظہار اعتماد

اس موقع پر اراکین اسمبلی نے نواز شریف کی قیادت پر مکمل اعتماد کا اظہار کرتے ہوئے کہا کہ “جب سب ناامید ہو جاتے ہیں تو نواز شریف قوم کو نئی امید دیتے ہیں۔ انہوں نے ریاست پر سیاست کو قربان کر کے حب الوطنی کی اعلیٰ مثال قائم کی ہے۔ ایک بار پھر ثابت ہو گیا کہ عوام کو حقیقی ریلیف صرف مسلم لیگ (ن) ہی دے سکتی ہے۔”

مریم نواز کا عزم

وزیراعلیٰ پنجاب مریم نواز نے کہا کہ قیادت، جماعت اور پنجاب کے عوام کا اعتماد ان کے لیے ایک بڑی ذمہ داری ہے۔ “نواز شریف اور شہباز شریف کی عوامی خدمت کے معیار پر پورا اترنا آسان نہیں، لیکن ہم عوامی خدمت کے مشن کو جاری رکھیں گے۔”

سیاسی و عوامی منصوبوں پر مشاورت

اجلاس میں عوامی فلاح کے منصوبوں اور آئندہ کی سیاسی حکمت عملی پر مشاورت بھی کی گئی۔ اجلاس میں مسلم لیگ (ن) کے سینئر رہنما سینیٹر پرویز رشید، رانا ثناء اللہ، پنجاب کی سینئر وزیر مریم اورنگزیب اور راشد نصر اللہ بھی موجود تھے۔

ملاقات میں پنجاب اسمبلی کے ڈپٹی اسپیکر ملک ظہیر اقبال چنڑ، صوبائی وزیر آبپاشی محمد کاظم پیرزادہ، چوہدری خالد محمود جگا، صاحبزادہ ایم غازی عباسی، ملک خالد محمود وارن، میاں محمد شعیب اویسی، چوہدری محمود احمد، محمد اجمل خان چانڈیا، عون حمید ڈوگر، سبطین رضا بخاری اور نواب خان گوپانگ سمیت دیگر رہنما شریک تھے۔

اس کے علاوہ صوبائی وزیر معدنیات شیر علی گورچانی، غلام اصغر خان گورمانی، صالح الدین خان کھوسہ، حنیف خان پتافی، محمد قادر خان لغاری، سردار علی احمد خان لغاری، محمد احمد خان لغاری، شیر افغان گورچانی، پرویز اقبال گورچانی، عبدالعزیز خان دریشک اور خضر حسین مزاری نے بھی اجلاس میں شرکت کی۔