Pakistan has convinced the IMF to reduce electricity tariffs, final decision expected next month
اسلام آباد: پاکستان نے بجلی کے نرخ میں 2 روپے فی یونٹ کمی کے لیے بین الاقوامی مالیاتی فنڈ (آئی ایم ایف) کو راضی کرلیا ہے، تاہم بجلی کے بنیادی ٹیرف میں کمی کا حتمی فیصلہ آئندہ ماہ کیا جائے گا۔
ذرائع کے مطابق، پاکستان اور آئی ایم ایف کے درمیان ایک ارب ڈالر کی قسط کے حوالے سے مذاکرات جاری ہیں۔ مذاکرات کے دوران بجلی کے بنیادی ٹیرف میں 1.5 سے 2 روپے تک کمی کے حوالے سے تفصیلی گفتگو ہوئی، جس کے بعد آئی ایم ایف نے اصولی طور پر اس کمی کی منظوری دے دی ہے۔
عالمی مالیاتی ادارے نے بجلی کے ٹیرف میں کمی کی منظوری تو دے دی ہے، تاہم اس کے لیے پاکستان کو بجلی کی تقسیم کار کمپنیوں (ڈسکوز) کی نجکاری کا مکمل منصوبہ پیش کرنا ہوگا۔
ذرائع کے مطابق، آئی ایم ایف ڈسکوز کی کارکردگی سے غیر مطمئن ہے اور توانائی کے شعبے میں ہونے والے نقصانات پر شدید تشویش کا اظہار کرچکا ہے۔ ادارے کا کہنا ہے کہ بجلی کے شعبے میں اصلاحات کی سب سے بڑی رکاوٹ ڈسکوز کی ناقص کارکردگی ہے۔
حکومت پاکستان نے اس حوالے سے آئی ایم ایف کو تین ڈسکوز کی نجکاری کا منصوبہ پیش کر دیا ہے، جس کے تحت پہلے مرحلے میں آئیسکو، فیسکو اور گیپکو جبکہ دوسرے مرحلے میں میپکو، لیسکو اور حیسکو کو نجی شعبے کے حوالے کیا جائے گا۔
آئی ایم ایف کا مؤقف ہے کہ جب تک بجلی کی تقسیم کار کمپنیوں کی نجکاری نہیں کی جاتی، توانائی کے شعبے میں پائیدار بہتری ممکن نہیں۔
