دل کا دورہ: تمیم اقبال کی حالت اب کیسی ہے؟ تازہ اپڈیٹ جاری

بنگلہ دیش کرکٹ بورڈ (بی سی بی) کے چیف میڈیکل آفیسر دیباشیش چودھری نے تمیم اقبال کی صحت سے متعلق تازہ ترین معلومات فراہم کی ہیں۔

بنگلہ دیش کے معروف کرکٹر تمیم اقبال کو پیر کے روز ڈھاکہ پریمیئر لیگ کے میچ کے دوران دل کا دورہ پڑا۔ فیلڈنگ کے دوران انہیں سینے میں تکلیف محسوس ہوئی، جس کے بعد فوری طور پر اسپتال منتقل کر دیا گیا۔

چیف میڈیکل آفیسر کے مطابق، تمیم اقبال کی ایک شریان میں رکاوٹ پائی گئی جسے دور کرنے کے لیے اسٹنٹ ڈالا گیا، تاہم ان کی دیگر شریانیں صحت مند ہیں اور ان کی مجموعی حالت میں تیزی سے بہتری آ رہی ہے۔

انہوں نے مزید بتایا کہ تمیم اقبال کی طبیعت بہتر ہو رہی ہے اور آئندہ 24 گھنٹوں میں مزید بہتری کی توقع ہے۔ اسپتال کی رپورٹ کے مطابق ان کے دیگر اعضا بالکل درست کام کر رہے ہیں اور ڈاکٹرز ان کی جلد صحت یابی کے لیے پُرامید ہیں۔

دوسری جانب، کے پی جے اسپیشلائزڈ اسپتال کے میڈیا ڈائریکٹر ڈاکٹر راجیب حسن نے بتایا کہ تمیم اقبال کا فوری طور پر اینجیوگرام، اینجیوپلاسٹی اور اسٹنٹنگ کیا گیا، جس کے بعد ان کی بند شریان کو کھول دیا گیا ہے اور اب ان کی حالت میں مسلسل بہتری آ رہی ہے۔

تمیم اقبال نے اپنے 16 سالہ شاندار بین الاقوامی کیریئر میں 391 میچز کھیل کر 15,249 رنز بنائے۔ ان کی بیماری کی خبر سنتے ہی دنیا بھر کے کرکٹرز نے سوشل میڈیا پر ان کی جلد صحت یابی کے لیے نیک تمناؤں کا اظہار کیا۔