Establishment of special courts to protect the property of overseas Pakistanis
اسلام آباد میں اوورسیز پاکستانیوں کی جائیداد سے متعلق تنازعات کے جلد اور مؤثر حل کے لیے خصوصی عدالتوں کے قیام کا اعلان کر دیا گیا ہے۔
ایکسپریس نیوز کے مطابق، اوورسیز پراپرٹی ایکٹ 2024 کے تحت اسلام آباد ہائی کورٹ کے قائم مقام چیف جسٹس نے خصوصی عدالتیں نامزد کرنے کی ہدایت جاری کر دی ہے۔ اس سلسلے میں ججز کی نامزدگی کا اختیار سیشن ججز کو دے دیا گیا ہے۔
اسلام آباد ہائی کورٹ کے رجسٹرار نے اس حوالے سے سیکرٹری قانون و انصاف کو ایک خط ارسال کیا ہے، جس میں کہا گیا ہے کہ سیشن ججز ایسٹ اور ویسٹ اوورسیز پاکستانیوں کے کیسز کے لیے خصوصی عدالتیں نامزد کریں گے۔ خط میں مزید ہدایت کی گئی ہے کہ زیر التوا کیسز اور ججز کے تجربے کو مدنظر رکھتے ہوئے سیشن کورٹس میں ججز کی تعیناتی کی جائے۔
خط میں یہ بھی کہا گیا ہے کہ اوورسیز پراپرٹی ایکٹ کے تحت وزارت قانون سیشنز ایسٹ اور ویسٹ کے نوٹیفکیشن جاری کرے۔
دوسری جانب، اسلام آباد ہائی کورٹ میں بھی خصوصی بینچ تشکیل دے دیا گیا ہے، جو اوورسیز پاکستانیوں کی جائیداد سے متعلق کیسز کی سماعت کرے گا۔
جسٹس خادم حسین سومرو کو سمندر پار پاکستانیوں کے جائیداد سے متعلق کیسز اور اپیلوں کی سماعت کی ذمہ داری سونپی گئی ہے۔ اس حوالے سے قائم مقام چیف جسٹس کی منظوری سے ڈپٹی رجسٹرار نے نوٹیفکیشن بھی جاری کر دیا ہے۔
